September 08,2024: ಮೊಂತಿ ಫೆಸ್ತಾಚ್ಯಾ ಸುವಾಳ್ಯಾರ್ ತೊಡಂಬಿಲ್ ಫಿರ್ಗಜಿಚೆಂ ನವೆಂಚ್ ವೆಬ್ ಸೈಟ್ www.thodambilachurch.in ಸೈರೊ ಯಾಜಕ್ ಮಾ| ದೊ। ಸುನಿಲ್ ಸೋಜ್ ಬಾಪ್ ತಶೆಂಚ್ ಫಿರ್ಗಜ್ ವಿಗಾರ್ ಮಾ| ಆಂಟನಿ ಲೋಬೊ ಬಾಪಾಂನಿಂ ಉಗ್ತಾಯ್ಲೆಂ.   'ವೆಬ್ ಸೈಟ್ ಭೋವ್'ಚ್ಚ್  ಸೊಬಿತ್ ರಿತಿನ್ ಮಾಂಡುನ್ ಹಾಡ್'ಲ್ಲ್ಯಾ ವೆಬ್ ಸೈಟ್ ಸಮಿತಿಕ್ ವಿಗಾರ್ ಬಾಪಾಂನಿಂ ಉಲ್ಲಾಸಿಲೆಂ ಆನಿ ಹೊಗ್ಳಿಕ್ ಉಚಾರ್ಲಿ.  ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಶ್ ಶ್ರೀ ಜೇಸನ್ ಮೊಂತೇರೊ, ಕಾರ್ಯಾಧರ್ಶಿ ಶ್ರೀಮತಿ ಶಾಂತಿ ಫೆರ್ನಾಂಡಿಸ್ ಆನಿ ಸರ್ವ್ ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ನಿರ್ಮಲ ಡೇಸಾ  ಹಾಜರ್ ಆಸ್ಲಿಂ.  

September 08,2024: ತೊಡಂಬಿಲ್ ಫಿರ್ಗಜ್ಗಾರ್, ಉತ್ತಮ್ ಶಿಕ್ಷಕ್ ಜಿಲ್ಲಾ ಪ್ರಶಸ್ತಿ ಅಪ್ಣಾಯಿಲ್ಲೊ ಶಿಕ್ಷಕ್ ಶ್ರೀ ಫ್ರಾನ್ಸಿಸ್ ಡೆಸಾಕ್ ಸನ್ಮಾನ್ ಕಾರ್ಯೆ ಫಿರ್ಗಜೆ ತರ್ಫೆನ್ ಮಾಂಡುನ್ ಹಾಡ್ ಲ್ಲೆಂ.  ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಶ್ ಶ್ರೀ ಜೇಸನ್ ಮೊಂತೇರೊ ಹಾಣಿಂ ಸನ್ಮಾನ್ ಪತ್ರ್ ವಾಚ್ಲೆಂ ಆನಿ ಅಭಿನಂದನ್ ಪಾಟಯ್ಲೆಂ ವಿಗಾರ್ ಬಾಪಾನಿಂ ಶೊಲ್ ಪಾಂಗ್ರುನ್ ಸನ್ಮಾನ್ ಕೆಲೊ. ಸಯ್ರೆ ಯಾಜಕ್ ಮಾ| ದೊ । ಸುನಿಲ್ ಸೋಜ್ ಬಾಪಾನಿಂ ಫುಲಾಂ-ಫಳಾಂ ಸವೆಂ  ಮಾನ್ ಕೆಲೊ. ಗೊವ್ಳಿಕ್ ಪರಿಷದೆಚಿ ಕಾರ್ಯಾಧರ್ಶಿ ಶ್ರೀಮತಿ ಶಾಂತಿ ಫೆರ್ನಾಂಡಿಸ್ ಆನಿ ಸರ್ವ್ ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ನಿರ್ಮಲ ಡೇಸಾ  ಹಾಜರ್ ಆಸ್ಲಿಂ.  

September 08,2024: ಜೆಜುಚ್ಯಾ ಪವಿತ್ರ್ ಕಾಳ್ಜಾಚ್ಯಾ ತೊಡಂಬಿಲ್ ಫಿರ್ಗಜಿಂತ್ ಮೊಂತಿ ಫೆಸ್ತಾಚ್ಯಾ ಸುವಾಳ್ಯಾರ್ ಮಿಸಾ ಉಪ್ರಾಂತ್ ವಾಹಾನಾಂ ಬೆಂಜಾರ್ ಕೆಲಿಂ. ಸಯ್ರೆ ಯಾಜಕ್ ಮಾ| ದೊ । ಸುನಿಲ್ ಸೋಜ್ ಬಾಪಾನಿಂ ಮಾಗ್ಣ್ಯಾ ವಿದಿ ಚಲವ್ನ್ ವೆಲಿ ಆನಿ ವಿಗಾರ್ ಆಂಟನಿ ಲೋಬೊ ಬಾಪಾಂ  ಸಂಗಿಂ ವಾಹಾನಾಂ ಬೆಂಜಾರ್ ಕೆಲಿಂ. ಫಿರ್ಗಜಿಚ್ಯಾ ಸರ್ವ್ ಕುಟ್ಮಾಚಿಂ ವಾಹಾನಾಂ ಶಿಸ್ತೆನ್ ಇಗರ್ಜೆ ಅಂಗಣಾಂತ್ ಮಾಂಡುನ್ ರವಯಿಲ್ಲಿಂ.

September 08,2024: ಜೆಜುಚ್ಯಾ ಪವಿತ್ರ್ ಕಾಳ್ಜಾಚ್ಯಾ ತೊಡಂಬಿಲ್ ಫಿರ್ಗಜಿಂತ್ ವರ್ತ್ಯಾ ದಬಾಜಾನ್ ಮೊಂತಿ ಫೆಸ್ತ್ ಆಚರಣ್ ಕೆಲೆಂ. ಪಚ್ಚಿನಡ್ಕ ವಯ್ಲ್ಯಾ ಬಸ್ ಸ್ಟ್ಯಾಂಡಾ ಲಾಗ್ಸರ್ ನವೆಂ ಬೆಂಜಾರ್ ಕರುನ್  ಥಂಯ್ ಥಾವ್ನ್ ಬೆಂಡಾ ವಾಜ್ಪಾನ್, ಗರ್ನಾಳಿಂಚ್ಯಾ ಆವಾಜಾನ್, ಬಾರಾ ಧಾಮಾಸ್ಕಾಚ್ಯಾ ಸತ್ರ್ಯಾಂ ಸಂಗಿಂ, ಗಿತಾಂ ಗಾವುನ್, ಪುರ್ಶಾಂವಾರ್  ತೊಡಂಬಿಲ್ಚ್ಯಾ ಗ್ರೋಟ್ಟ್ಯಾ ಲಾಗಿಂ ಜಮೊ  ಜಾವುನ್ ಮರಿಯೆಕ್ ಫುಲಾಂ ಅರ್ಪುನ್ ಮರಿಯೆಕ್ ಮಾನ್ ಕೆಲೊ. 'ಆಮಿಂ ಮರಿಯೆ ಬರಿ  ಭರ್ವಶ್ಯಾಚಿಂ ವ್ಯಕ್ತಿ ಜಾವ್ಯಾಂ ' ಮ್ಹಳ್ಳ್ಯಾ ಸಂದೇಶಾ ಖಾಲ್ ದಾಬಾಜಿಕ್ ಮಿಸಾ ಬಲಿಧಾನ್ ಭೆಟವ್ನ್ ದೆವಾಕ್ ಅರ್ಗಾಂ ದೀವ್ನ್ ಹರ್ಸಿಲೆಂ. ಪ್ರದಾನ್ ಯಾಜಕ್ ಜಾವ್ನ್ ಮಾ। ಸುನಿಲ್ ಸೋಜ್ ಬಾಪಾನಿಂ ಫೆಸ್ತಾಚೊ ಸಂದೇಶ್ ದಿಲೊ ಆನಿ ದೆವಾಚೆ ಉತರ್ ಮೊಡುನ್ ವಾಂಟ್ಲೆಂ. ವಿಗಾರ್ ಬಾಪಾಂನಿ ಸಹಭೆಟವ್ಣಿ ಕೆಲಿ ಆನಿ ಸರ್ವಾಂಕ್ ವಂದಿಲೆಂ. ಮುಡ್ದೋಮ್ ರಾವುನ್ ಆಧಾರ್ ದಿಲ್ಯಾಂಕ್ ಮಾನಾಚಿ ವಾತ್  ದೀವ್ನ್ ವಂದಿಲೆಂ. ಜಮ್ಲೆಲ್ಯಾ  ಸರ್ವಾಂಕ್ ನವ್ಯಾ ಭಾತಾಚಿ  ಕಣ್ಶಿ  ವಾಂಟ್ಲಿ. ಮಿಸಾ ಉಪ್ರಾಂತ್ ಸಮೇಸ್ತಾಂಕ್ ಬೆಂಜಾರ್ ನವೆಂ ಘಾಲ್ನ್ ವೊರ್ನ್  ವಾಂಟ್ಲೆಂ.  ಮೊಂತಿ ಫೆಸ್ತಾಚೆ ಕೊಬು ಸರ್ವಾಂಕ್ ದಾದೋಸ್ ಕರುಂಕ್ ಪಾವ್ಲೆ .

September 07,2024: ಜೆಜುಚ್ಯಾ ಪವಿತ್ರ್ ಕಾಳ್ಜಾಚ್ಯಾ ತೊಡಂಬಿಲ್ ಫಿರ್ಗಜಿಂತ್ ಮೊಂತಿ ಮಾಯೆಕ್ ನೋವ್ ದಿಸಾಂಚೆಂ ನೊವೆನ್ ವಿಗಾರ್ ಮಾ| ಆಂಟನಿ  ಲೋಬೊ ಬಾಪಾಂಚ್ಯಾ ಮುಖೆಲ್ಪಣಾರ್, ಭಕ್ತಿಪಣಾನ್ ಆನಿ ಉರ್ಬೆನ್ ಚಲ್ಲೆಂ. ಸರ್ವ್ ಭುರ್ಗ್ಯಾಂನಿಂ  ತಶೆಂಚ್ ವ್ಹಡಾಂನಿ ಮರಿಯೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ನೋವ್ ದಿಸಾಂನಿ ನೋವ್ ವೆವೆಗ್ಳ್ಯಾ ಇರಾದ್ಯಾ ಪಾಸತ್ ಮಾಗ್ಲೆಂ ಆನಿ ದೆವಾಕ್ ಅರ್ಗಾಂ ಭೆಟಯ್ಲಿಂ. ಬೊರ್ಯಾ ಮನಾಚ್ಯಾ ಧಾನಿಂಚ್ಯಾ ಸಹಕಾರಾನ್ ಹರ್ಯೆಕಾ ದಿಸಾ  ಸರ್ವಾಂಕ್ ಗೊಡ್ಶೆಂ ವಾಂಟುನ್ ಸರ್ವಾಂಚಿಂ ಮನಾಂ ದಾದೋಸ್ ಕೆಲಿಂ.

September 01,2024: ಕಥೊಲಿಕ್ ಸಭಾ ತೊಡಂಬಿಲ್ ತಶೆಂಚ್ ಸ್ತ್ರೀ ಸಂಘಟನ್ ಹಾಂಚ್ಯಾ ಮುಖೆಲ್ಪಣಾರ್ ಮರಿಯಾಳ್ ಗಿತಾಂ ಸ್ಪರ್ಧೊ ಫಿರ್ಗಜಿಚ್ಯಾ ಸಭಾಸಾಲಾಂತ್ ಚಲ್ಲೊ. ವಿವಿದ್ ವಿಬಾಗಾಂತ್ ಎಕೊಡೆಂ ಗಾಯಾನ್ ತಶೆಂಚ್ ವಾಡ್ಯಾವಾರ್ ಪಂಗಡ್ ಗಾಯಾನ್ ಅಶೆಂ ಲಗ್ಬಗ್ 70 ಜಣಾಂನಿ ಭಾಗ್ ಘೆತ್ಲೊ ಆನಿಂ ಸಬಾರಾಂನಿ ಇನಾಮಾಂ ಅಪ್ಣಾಯ್ಲಿಂ. ವ್ಹರಯ್ಣಾರಾಂನಿ ಫಿರ್ಗಜೆಂತ್ಲಿ ತಾಲೆಂತಾ ಪಳೆವ್ನ್ ಹೊಗ್ಳಿಕ್ ಉಚಾರ‍್ಲಿ. ಫಿರ್ಗಜ್ ವಿಗಾರ್ ಆ್ಯಂಟನಿ ಲೋಬೊ ಬಾಪಾನಿಂ ಸಂದೇಶ್ ದಿವ್ನ್ ಸರ್ವಾಂಕ್ ಉಲ್ಲಾಸಿಲೆಂ ಆನಿ ಅಪ್ಲಿಂ ತಾಲೆಂತಾ ಪರ್ಕುನ್ ತಿಂ ಉರ್ಜಿತ್ ಕರುಂಕ್ ಆನಿ ಸಮಾಜೆಚ್ಯಾ ಬರೆಪಣಾಕ್ ಗಳ್ಸುಂಕ್ ಉಲೊ ದಿಲೊ.

August 18,2024: ಭಲಾಯ್ಕಿ  ಆಯೋಗ್, ಕುಟ್ಮಾ ಆಯೋಗ್ ಆನಿ ಸಾಮಾಜಿಕ್ ಸಂಪರ್ಕ್ ಆಯೋಗಾಚಾ ಸಹಾಕರಾನ್ ಮಾಂಡುನ್ ಹಾಡ್‌ಲ್ಲೆಂ ಪ್ರಥಮ್ ಚಿಕಿತ್ಸಾ ಶಿಬಿರ್ ಕಾರ್ಯೆಂ ಸಕಾಳಿಚ್ಯಾ ಮಿಸಾ ಉಪ್ರಾಂತ್ ಆಮ್ಚ್ಯಾ ಇಗರ್ಜೆಚ್ಯಾ ಮಿನಿ ಹೊಲಾಂತ್ ಚಲವ್ನ್  ವ್ಹೆಲೆಂ. ಫಾ. ಮುಲ್ಲರ್ ಆಸ್ಪೆತ್ರೆಚೆ ಸಿಬಂಧಿ ಯೇವ್ನ್   ಪ್ರಥಮ್  ಚಿಕಿತ್ಸೆ ವಿಶಿಂ,  ಸಿ.ಪಿ.ಆರ್(CPR), ಚೊಕಿಂಗ್(Choking)  ಅಶೆಂ ವಿವಿದ್ ವಿಶಯಾಂಚೆರ್   ಮಾಹೆತ್ ದಿಲಿ. ವಿಗಾರ್ ಆ್ಯಂಟನಿ ಲೋಬೊ ಬಾಪಾನಿಂ ಉಲವ್ನ್ ಅಸ್ಲಿ ಮಾಹೆತ್ ತುರ್ತ್ ಸಂಧರ್ಬಾರ್ ಗರ್ಜೆಚಿ ಆನಿಂ ಹ್ಯಾ ವಿಶಿಂ ಜಾಣ್ವಾಯ್ ಅಪ್ಣಾಯ್ಜಯ್ ಅಶೆಂ ಸಾಂಗ್ಲೆ. ಸಬಾರ್ ಲೋಕ್ ಹಾಜರ್ ಜಾವ್ನ್ ಶಿಬಿರ್ ಯಶಶ್ವಿ ಕೆಲೆಂ. 

August 15,2024: ಸ್ವಾತಂತ್ರ್ ದಿಸಾ ಸಂಧರ್ಬಿ ಆಮ್ಚ್ಯಾ ಐಸಿವೈಎಮ್  ಸಾ೦ದ್ಯಾನಿಂ ಪರಿಸರ್ ಸ್ವಚ್ಛತಾ ಕಾರ್ಯೆ೦ ಮಾಂಡುನ್ ಹಾಡ್ಲೆಂ. ಹಾಚೊ ವಾವ್ರ್ ಜಾವ್ನ್ ಆಮ್ಚ್ಯಾ ಇಗರ್ಜೆ ವಠಾರಾ ಥಾವ್ನ್ ಕಲ್ಪನೆ ಪರ್ಯಾಂತ್ ರಸ್ತ್ಯಾ ದೆಗೆನ್ ಆಸ್ಲೊ ಕೊಯ್ರ್ ಜಮೊ ಕೆಲೊ. ಪ್ರಕೃತಿ ರಾಕಣೆ ತೆವ್ಶಿಂ ತರ್ನಾಟ್ಯಾಂಚೊ ವಾವ್ರ್ ಹೊಗ್ಳಿಕೆಚೊ ಜಾಲೊ.

August 11,2024: ಕಥೋಲಿಕ್ ಸಭಾ ತಶೆಂಚ್ ಶಿಕ್ಪಾ ಆನೀ ಯುವಜನಾಂಚೊ ಆಯೋಗ್ ಸಾಂಗಾತಾ ಮೆಳೊನ್ ಫಿರ್ಗಜೆಚ್ಯಾ ಶಿಕ್ಪಾಂತ್ ತಾಲೆಂತ್ವಂತ್ ಭುರ್ಗ್ಯಾಂಕ್ ಮಾನ್ ಕರುನ್ ಪುರಸ್ಕಾರ್ ದಿಂವ್ಚೆಂ ಕಾರ್ಯೆಂ ಸಕಾಳಿಂಚ್ಯಾ ಮೀಸಾ ಉಪ್ರಾಂತ್ ಆಸಾ ಕೆಲ್ಲೆ . ಆಮ್ಚ್ಯಾ ಫಿರ್ಗಜಿಚ್ಯಾ 17 ಭುರ್ಗ್ಯಾಂಕ್ ಹೊ ಮಾನ್ ಫಾವೊ ಜಾಲೊ. ಶಿಕ್ಪಾಂತ್ ರ‍್ಯಾಂಕ್ ಅಪ್ಣಾಯಿಲ್ಲ್ಯಾ ರ‍್ಯಾನ್ಸನ್ ಕುತಿನ್ಹೊ ತಶೆಂಚ್ ನಿಶಾಲ್ ಫೆರ್ನಾಂಡಿಸ್ ಹಾಂಕಾ ಶೊಲ್ ಪಾಂಗ್ರುನ್ ಮಾನ್ ಕೆಲೊ.

July 21,2024: ಕಥೊಲಿಕ್ ಸಭಾ, ಸ್ತ್ರೀ ಸಂಘಟನ್, ಪವಿತ್ರ್ ಕಾಳ್ಜಾ ವಾಡೊ ಹಾಂಚ್ಯಾ ಮುಖೆಲ್ಪಣಾರ್ ಆನಿ ಸಾಂ. ಲುವಿಸ್ ವಿಶ್ವವಿಧ್ಯಾಲಯ್ ಹಾಂಚ್ಯಾ ಸಹಕಾರಾನ್ ವ್ಹಡ್ ಮಟ್ಟಾರ್ ಜಲ- ಬಂಧನ್ ಕಾರ್ಯಕ್ರಮ್ ಮಾಂಡುನ್ ಹಾಡ್‌ಲ್ಲೆಂ. ಸರಿಸುಮಾರ್ 90 ಜನಾಂ ಹಾಜರ್ ಆಸ್ಲಿಂ. ಹಾಂತುನ್ ಸುಮಾರ್ 60  ಭುರ್ಗಿ೦ ಕಾಲೇಜಿ ಥಾವ್ನ್ ಹಾಜರ್ ಆಸ್ಲಿಂ. ಸಾಕಾಳಿಂ 9 ವೊರಾಂ ಥಾವ್ನ್ ಸಾಂಜೆಚ್ಯಾ ಕಾಫಿ-ಫ್ಹಳಾರಾ ಮ್ಹಣಾಸರ್, ತೊಡಂಬಿಲ್ಚ್ಯಾ ಗುಡ್ಯಾ ಸುವಾತೆರ್ 150 ವಯ್ರ್ ಉದ್ಕಾ ಜಿರಂವ್ಣೆ ಗುಂಡ್ಯೊ ಕಾಡುನ್ ಸರ್ವಾಂಕ್ ದೆಕಿಚೊ ವಾವ್ರ್ ಕೆಲೊ. ವಿಗಾರ್ ಆ್ಯಂಟನಿ ಲೋಬೊ ಬಾಪಾನಿಂ ಕಾರ್ಯೆಂ ಉದ್ಘಾಟನ್ ಕೆಲೆಂ. ಸಾಂಜೆರ್ ಸಮಾರೊಪ್ ಕಾರ್ಯೆಂ, ಧನ್ಯಾವಾದಾ ಸವೆಂ ಆಖೇರ್ ಕೆಲೆಂ.

July 18,2024: ಆಮ್ಚ್ಯಾ ಫಿರ್ಗಜಿಚ್ಯಾ ಎಕಾ ಗರ್ಜೆವಂತ್  ಕುಟ್ಮಾಕ್ ಸರ್ವ್ ಫಿರ್ಗಜ್ಗಾರಾಂಚ್ಯಾ ತಶೆಂಚ್ ಸಿಒಡಿಪಿ ಸಂಸ್ಥ್ಯಾಚ್ಯಾ ಸಹಕಾರಾನ್ ಸೊಭಯಿಲ್ಲ್ಯಾ ಘರಾಚೆಂ ಉಗ್ತಾವಣ್ ಆನಿಂ ಆಶಿರ್ವಚನ್ ವಿಗಾರ್ ಆ್ಯಂಟನಿ ಲೋಬೊ ಬಾಪಾನಿಂ ಚಲವ್ನ್ ವ್ಹೆಲೆಂ.  ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಶ್ ಶ್ರೀ  ಜೇಸನ್ ಮೊಂತೇರೊ ಹಾಣಿಂ ಸ್ವಾಗತ್ ಕೆಲೆಂ. ಕಾರ್ಯಧರ್ಶಿ ಶ್ರೀಮತಿ ಶಾಂತಿ ಫೆರ್ನಾಂಡಿಸ್ ಹಾಣಿಂ ಧನ್ಯವಾದ್ ದಿಲೆಂ. ವಿಗಾರ್ ಬಾಪಾನಿಂ ಫಿರ್ಗಜ್ ಗಾರಾಂಚ್ಯಾ ಉದಾರ್ಪಣಾಕ್ ಹೊಗ್ಳಿಕ್  ಉಚಾರ್ಲಿ.